Молитва понтилею целителю о здравии своем: Молитва Пантелеймону об исцелении | bibliya-online.ru — КРАЕВОЕ ГОСУДАРСТВЕННОЕ БЮДЖЕТНОЕ УЧРЕЖДЕНИЕ ЗДРАВООХРАНЕНИЯ

Акафист святому великомученику и целителю Пантелеимону — Акафистник

А҆ка́ѳїстъ ст҃о́мꙋ великомч҃нкꙋ и҆ цѣли́телю пантелеи́монꙋ.

Конда́къ а҃.

И҆збра́нный страстоте́рпче хрⷭ҇то́въ и҆ врачꙋ̀ блгⷣтный, тꙋ́не подаѧ́й недꙋ́гꙋющымъ и҆сцѣлє́нїѧ, пѣ́сньми восхвалѧ́емъ тѧ̀, застꙋ́пника на́шего. Ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ бѣ́дъ и҆ болѣ́зней свобожда́й на́съ, любо́вїю тебѣ̀ зовꙋ́щихъ:

Ра́дꙋйсѧ, великомч҃ниче и҆ цѣли́телю пантелеи́моне.

І҆́косъ а҃.

А҆́гг҃ла земна́гѡ и҆ нбⷭ҇нагѡ человѣ́ка вѣ́мы тѧ̀, сла́вный пантелеи́моне: а҆́гг҃льскою бо непоро́чностїю и҆ мꙋ́ченичествомъ ᲂу҆кра́шенъ, пресели́лсѧ є҆сѝ ѿ землѝ на нб҃о, и҆дѣ́же со а҆́гг҃лы и҆ всѣ́ми ст҃ы́ми предстоѧ̀ прⷭ҇то́лꙋ гдⷭ҇а сла́вы, моли́сѧ ѡ҆ на́съ, земны́хъ, почита́ющихъ тѧ̀ зва̑нїи си́ми:

Ра́дꙋйсѧ, свѣ́тлосте бл҃гоче́стїѧ: ра́дꙋйсѧ, пресла́вный свѣти́льниче цр҃кви.

Ра́дꙋйсѧ, мч҃никѡвъ пречестны́хъ ᲂу҆краше́нїе: ра́дꙋйсѧ, вѣ̑рныхъ въ непоколеби́момъ терпѣ́нїи ᲂу҆твержде́нїе.

Ра́дꙋйсѧ, ю҆́ности преизрѧ́днаѧ похвало̀: ра́дꙋйсѧ, побо́рниче хрⷭ҇то́въ, въ мꙋ́жествѣ неѡдолѣ́нный.

Ра́дꙋйсѧ, произра́стшїй въ мі́рѣ, премі́ренъ ꙗ҆ви́выйсѧ: ра́дꙋйсѧ, а҆́гг҃ле во пло́ти, превосходѧ́й сме́ртныхъ.

Ра́дꙋйсѧ, небожи́телю всебл҃же́нный: ра́дꙋйсѧ, бжⷭ҇твеннагѡ ра́зꙋма вмести́лище.

Ра́дꙋйсѧ, и҆́мже вѣ́ра возвы́сисѧ: ра́дꙋйсѧ, и҆́мже пре́лесть низложи́сѧ.

Ра́дꙋйсѧ, великомч҃ниче и҆ цѣли́телю пантелеи́моне.

Конда́къ в҃.

Ви́дѧ тѧ̀ влⷣка сосꙋ́дъ и҆збра́нъ, возлюбѝ дꙋшѝ твоеѧ̀ добро́тꙋ. Ты́ бо земнꙋ́ю всѧ́кꙋю сла́дость и҆ сла́вꙋ презрѣ́въ, вѣнце́мъ мꙋ́ченическимъ возжелѣ́лъ є҆сѝ ᲂу҆краси́тисѧ, ᲂу҆ѧ́звленъ бжⷭ҇твенною любо́вїю, и҆ вдохнове́ннѡ поѧ̀: А҆ллилꙋ́їа.

І҆́косъ в҃.

Ра́зꙋмъ бг҃одꙋхнове́нъ и҆мѣ́ѧ, ѽ до́блїй вои́телю пантелеи́моне, и҆зꙋми́лъ є҆сѝ царѧ̀ маѯїмїа́на мꙋ́жествомъ дꙋшѝ твоеѧ̀ и҆ словесы̀, и҆́миже дерзнове́ннѡ проповѣ́далъ є҆сѝ хрⷭ҇та̀. Тѣ́мже похвалѧ́юще дерзнове́нїе твоѐ, глаго́лемъ тѝ си́це:

Ра́дꙋйсѧ, ᲂу҆грѡ́зы маѯїмїа́на презрѣ́вый: ра́дꙋйсѧ, совѣ́тѡмъ нечести́выхъ не покори́выйсѧ.

Ра́дꙋйсѧ, насажде́нїе и҆́стиннагѡ бг҃опочита́нїѧ: ра́дꙋйсѧ, и҆скорене́нїе де́мѡнскагѡ слꙋже́нїѧ.

Ра́дꙋйсѧ, неи́стовства мꙋчи́телей и҆з̾ѡбличи́телю: ра́дꙋйсѧ, і҆́дѡльскїѧ пре́лести низложи́телю.

Ра́дꙋйсѧ, разгна́вый нечести́выхъ собо́рища: ра́дꙋйсѧ, премѣни́вый тлѣ̑ннаѧ на нбⷭ҇наѧ.

Ра́дꙋйсѧ, собесѣ́дниче невеще́ственныхъ а҆́гг҃лѡвъ: ра́дꙋйсѧ, сликовствова́телю многострада́льныхъ ст҃ы́хъ.

Ра́дꙋйсѧ, и҆́мже сатана̀ посрами́сѧ: ра́дꙋйсѧ, и҆́мже хрⷭ҇то́съ просла́висѧ.

Ра́дꙋйсѧ, великомч҃ниче и҆ цѣли́телю пантелеи́моне.

Конда́къ г҃.

Си́лою вы́шнѧгѡ, дарова́нною тебѣ̀, и҆ крѣ́пкимъ терпѣ́нїемъ твои́мъ ѡ҆безси́лилъ є҆сѝ мꙋчи́телевꙋ де́рзость, мꙋ́жественный побѣдоно́сче: ѻ҆гнѧ̀, ѕвѣре́й, колеса̀ не ᲂу҆боѧ́всѧ и҆ мече́мъ ᲂу҆сѣ́ченъ во главꙋ̀, вѣне́цъ побѣ́ды прїѧ́лъ є҆сѝ ѿ хрⷭ҇та̀ бг҃а, взыва́ѧ є҆мꙋ̀: А҆ллилꙋ́їа.

І҆́косъ г҃.

И҆мꙋ́щи ѡ҆би́тель твоѧ̀ вседрагꙋ́ю главꙋ̀ твою̀, бг҃омꙋ́дрый страстоте́рпче, ꙗ҆́кѡ превели́кое сокро́вище, ра́дости и҆сполнѧ́етсѧ ѡ҆ се́мъ и҆, любо́вїю воспѣва́ющи да́ннꙋю тебѣ̀ ѿ бг҃а блгⷣть и҆сцѣле́нїй, бл҃года́рнѡ зове́тъ тѝ:

Ра́дꙋйсѧ, нїкомиді́и свѣти́льниче всесвѣ́тлый: ра́дꙋйсѧ, чтꙋ́щей тѧ̀ ѡ҆би́тели стра́же неꙋсы́пный.

Ра́дꙋйсѧ, и҆́мже ѡ҆хладѐ безбо́жїе: ра́дꙋйсѧ, и҆́мже возрастѐ бг҃опозна́нїе.

Ра́дꙋйсѧ, свѣ́тлаѧ страстоте́рпцєвъ сла́во: ра́дꙋйсѧ, ра́достное правосла́вныхъ слы́шанїе.

Ра́дꙋйсѧ, и҆сцѣле́нїй блгⷣтный и҆сто́чниче: ра́дꙋйсѧ, дарова́нїй вели́кихъ вмѣсти́лище.

Ра́дꙋйсѧ, благово́нное мѵ́ро, ѡ҆бл҃гоꙋха́ющее дꙋ́ши: ра́дꙋйсѧ, ꙗ҆́кѡ помога́еши призыва́ющымъ тѧ̀.

Ра́дꙋйсѧ, слѣпы̑мъ зрѣ́нїе дарова́вый: ра́дꙋйсѧ, хромы̑мъ бл҃гоше́ствїе ᲂу҆стро́ивый.

Ра́дꙋйсѧ, великомч҃ниче и҆ цѣли́телю пантелеи́моне.

Конда́къ д҃.

Бꙋ́рею помышле́нїй многобо́жїѧ ѡ҆держи́мъ, нечести́вый ца́рь смꙋти́сѧ, ᲂу҆ви́дѣвъ ѿ зави́ствовавшихъ тебѣ̀ врачє́въ, ꙗ҆́кѡ всѧ̑кїѧ неисцѣ̑льныѧ недꙋ̑ги цѣли́ши ты̀ и҆́менемъ хрⷭ҇та̀. Мы́ же, съ весе́лїемъ сла́вѧще ди́внаго въ тебѣ̀ бг҃а, вопїе́мъ є҆мꙋ̀: А҆ллилꙋ́їа.

І҆́косъ д҃.

Слы́шавше нїкомиді́йстїи лю́дїе ѡ҆ вели́комъ сострада́нїи твое́мъ къ стра́ждꙋщымъ и҆ ѡ҆ безме́здномъ врачева́нїи ѿ всѧ́кихъ болѣ́зней, ᲂу҆стреми́шасѧ всѝ къ тебѣ̀, съ вѣ́рою во врачꙋ́ющꙋю блгⷣть, въ тебѣ̀ сꙋ́щꙋю, и҆ прїе́млюще ско́раѧ и҆сцѣлє́нїѧ ѿ всѧ́кихъ болѣ́зней, прославлѧ́хꙋ бг҃а и҆ тебѐ велича́хꙋ, всемлⷭ҇тиваго цѣли́телѧ своего̀, зовꙋ́ще тѝ:

Ра́дꙋйсѧ, пома́занный мѵ́ромъ блгⷣти: ра́дꙋйсѧ, хра́ме бг҃а ѡ҆сщ҃е́нный.

Ра́дꙋйсѧ, вели́каѧ бл҃гочести́выхъ сла́во: ра́дꙋйсѧ, тве́рдаѧ ѡ҆ѕлоблѧ́емыхъ стѣно̀.

Ра́дꙋйсѧ, мꙋ́дрыхъ превосходѧ́й ра́зꙋмомъ: ра́дꙋйсѧ, вѣ̑рныхъ ѡ҆сїѧва́ѧй мы̑сли.

Ра́дꙋйсѧ, бжⷭ҇твенныхъ дарѡ́въ прїѧ́телище и҆ многоѡбра́зныхъ на́мъ млⷭ҇тей гдⷭ҇нихъ и҆сто́чниче: ра́дꙋйсѧ, ско́рый помо́щниче стра́ждꙋщымъ.

Ра́дꙋйсѧ, ѡ҆бꙋрева́емыхъ приста́нище: ра́дꙋйсѧ, заблꙋ́ждшихъ наста́вниче.

Ра́дꙋйсѧ, болѧ́щихъ тꙋ́не врачꙋ́ѧй: ра́дꙋйсѧ, ѡ҆би́льнѡ и҆сцѣлє́нїѧ и҆сточа́ѧй.

Ра́дꙋйсѧ, великомч҃ниче и҆ цѣли́телю пантелеи́моне.

Конда́къ є҃.

Чꙋ́до пресла́вное сотворѝ съ тобо́ю гдⷭ҇ь, є҆гда̀ чрез̾ слꙋжи́телѧ своего̀ є҆рмола́а призва́ тѧ въ чꙋ́дный сво́й свѣ́тъ. Е҆хі́дною бо ве́лїею ᲂу҆гры́зенно ᲂу҆ме́ршее ѻ҆троча̀ по мл҃твѣ твое́й ко хрⷭ҇тꙋ̀ а҆́бїе ѡ҆живѐ и҆ воста̀ здра́во. Позна́въ ᲂу҆̀бо жизнода́вца всѣ́хъ и҆́стиннаго бг҃а, съ тве́рдою вѣ́рою воззва́лъ є҆сѝ є҆мꙋ̀: А҆ллилꙋ́їа.

І҆́косъ є҃.

Оу҆зрѣ̀ свѣ́тъ слѣпы́й, є҆мꙋ́же съ призыва́нїемъ и҆́мене хрⷭ҇то́ва прикоснꙋ́лсѧ є҆сѝ ты̀, сла́вне. Е҆рмола́емъ бо пресвѵ́теромъ просвѣще́нъ, ѿри́нꙋвъ ѻ҆те́ческое многобо́жїе, воспрїѧ́лъ є҆сѝ ма́тернее бл҃гоче́стїе, и҆́мже и҆ ѻ҆тца̀ просвѣти́лъ є҆сѝ. Сегѡ̀ ра́ди тебѣ̀, сла́вномꙋ ᲂу҆го́дникꙋ бж҃їю и҆ чꙋ́дномꙋ врачꙋ̀, взыва́емъ:

Ра́дꙋйсѧ, къ бг҃ꙋ ве́лїе раче́нїе и҆мѣ́ѧй: ра́дꙋйсѧ, присногорѧ́щїй ѻ҆гню̀ бжⷭ҇твенныѧ любвѐ.

Ра́дꙋйсѧ, дѣ́ѧтельный послꙋ́шателю сщ҃е́нныхъ поꙋче́нїй є҆рмола́а: ра́дꙋйсѧ, послѣ́довавый совѣ́тѡмъ ма́тере твоеѧ̀ є҆ввꙋ́лы.

Ра́дꙋйсѧ, ꙗ҆́кѡ всѧ̑ разда́лъ є҆сѝ, да хрⷭ҇та̀ прїѡбрѧ́щеши: ра́дꙋйсѧ, любо́вь къ мі́рꙋ любо́вїю бж҃їею побѣди́вый.

Ра́дꙋйсѧ, ꙗ҆́кѡ вмѣ́стѡ сла́дкихъ мі́ра за хрⷭ҇та̀ лю̑таѧ страда̑нїѧ прїѧ́лъ є҆сѝ: ра́дꙋйсѧ, ꙗ҆́кѡ ѻ҆́бщникъ сотвори́лсѧ є҆сѝ стрⷭ҇те́мъ хрⷭ҇то́вымъ.

Ра́дꙋйсѧ, восторжествова́вый над̾ всѣ́ми страстьмѝ: ра́дꙋйсѧ, ᲂу҆краси́выйсѧ блгⷣтнымъ безстра́стїемъ.

Ра́дꙋйсѧ, и҆сполнѧ́ѧй ра́дости притека́ющыѧ къ тебѣ̀: ра́дꙋйсѧ, тꙋ́не и҆сцѣлѧ́ѧй всѣ́хъ блгⷣтїю хрⷭ҇то́вою.

Ра́дꙋйсѧ, великомч҃ниче и҆ цѣли́телю пантелеи́моне.

Конда́къ ѕ҃.

Проповѣ́дникъ и҆́стины ꙗ҆ви́сѧ просвѣще́нный тобо́ю тѣле́снѣ и҆ дꙋше́внѣ слѣпе́цъ: подо́бнѡ бо є҆ѵⷢ҇льскомꙋ слѣпцꙋ̀, дерзнове́ннѡ пред̾ всѣ́ми и҆сповѣ́да свѣ́та и҆́стиннагѡ хрⷭ҇та̀, просвѣща́юща всѧ́каго человѣ́ка, нечести́вагѡ же царѧ̀ и҆ бо́ги ꙗ҆зы́ческїѧ ᲂу҆кори́въ, чрез̾ ме́чное ᲂу҆сѣче́нїе взы́де къ немерца́ющемꙋ свѣ́тꙋ на нб҃сѝ пѣ́ти бг҃ꙋ: А҆ллилꙋ́їа.

І҆́косъ ѕ҃.

Съ свѣ́тлымъ лице́мъ предста́въ сꙋди́лищꙋ царе́вꙋ, дерзнове́ннѡ взыва́лъ є҆сѝ, пребл҃же́нне, во ᲂу҆слы́шанїе всѣ́хъ: всецѣлѣ́бнаѧ си́ла моѧ̀ и҆ сла́ва хрⷭ҇то́съ є҆́сть и҆́стинный бг҃ъ, влⷣка всѣ́хъ, мє́ртвыѧ воскреша́ѧй и҆ всѧ́къ недꙋ̑гъ ѿгонѧ́ѧй. За таково́е и҆сповѣ́данїе ᲂу҆бл҃жа́юще тѧ̀, глаго́лемъ:

Ра́дꙋйсѧ, ᲂу҆ста̀ громогла́снаѧ бжⷭ҇тва̀ хрⷭ҇то́ва: ра́дꙋйсѧ ѧ҆зы́че медото́чный, вѣща́ѧй є҆го̀ домострои́тельство.

Ра́дꙋйсѧ, вѣті́е превы́сшагѡ бг҃осло́вїѧ: ра́дꙋйсѧ, сѣ́ѧтелю мꙋ́дрый бл҃гоче́стїѧ.

Ра́дꙋйсѧ, сладкозвꙋ́чнаѧ вѣ́ры свирѣ́ль: ра́дꙋйсѧ, сла́вный проповѣ́дниче правосла́вїѧ.

Ра́дꙋйсѧ, пре́жде сме́рти ꙗ҆ви́вый ди̑внаѧ: ра́дꙋйсѧ, по сме́рти соверша́ѧй чꙋ̑днаѧ.

Ра́дꙋйсѧ, зри́телю сла́вы хрⷭ҇то́вой: ра́дꙋйсѧ, послꙋ́шателю молѧ́щихсѧ тебѣ̀.

Ра́дꙋйсѧ, пода́телю ми́лости тоѧ̑ тре́бꙋющымъ: ра́дꙋйсѧ, хода́таю бла̑гъ почита́ющымъ па́мѧть твою̀.

Ра́дꙋйсѧ, великомч҃ниче и҆ цѣли́телю пантелеи́моне.

Конда́къ з҃.

Мѵ́рѡ и҆злїѧ́сѧ на дꙋ́шꙋ твою̀, бг҃омꙋ́дрый цѣле́бниче, ѿ ᲂу҆тѣ́шителѧ дх҃а: тѣ́мже по сме́рти честны́ѧ ѡ҆ста́нки твоѧ̑, благоꙋха́нїемъ свои́мъ страсте́й ѕлосмра́дїе ѿгонѧ́ѧ, и҆сцѣле́нїе подаю́тъ вопїю́щымъ вѣ́рою бг҃ꙋ: А҆ллилꙋ́їа.

І҆́косъ з҃

Є҆гда̀ ᲂу҆зрѣ́ша і҆́дѡльстїи чти́тели многолѣ́тна разсла́блена, мл҃твою твое́ю, свѧ́те, воздви́гнꙋта и҆ ходѧ́ща, мно́зи ᲂу҆вѣ́роваша во хрⷭ҇та̀: жрецы́ же бѣсо́встїи, за́вистїю снѣда́еми, подвиго́ша царѧ̀ на ꙗ҆́рость. Тебѣ̀ ᲂу҆̀бо неща́днѡ за хрⷭ҇та̀ стрꙋ́жемꙋ и҆ ѡ҆палѧ́емꙋ бы́вшꙋ, со ᲂу҆миле́нїемъ зове́мъ:

Ра́дꙋйсѧ, наслаждє́нїѧ земна̑ѧ презрѣ́вый: ра́дꙋйсѧ, бла̑гъ веще́ственныхъ превы́сшїй.

Ра́дꙋйсѧ, ꙗ҆́кѡ всѧ̀ кра̑снаѧ мі́ра сегѡ̀ ни во что́же вмѣни́лъ є҆сѝ: ра́дꙋйсѧ, ꙗ҆́кѡ сла́вꙋ скоротекꙋ́щꙋю съ себє̀ ѡ҆трѧ́слъ є҆сѝ.

Ра́дꙋйсѧ, неꙋлови́мъ пребы́вый ловле́нїѧ велїа́ра: ра́дꙋйсѧ, побѣди́вый мꙋчи́телѧ кова̑рства.

Ра́дꙋйсѧ, не пощади́вый за хрⷭ҇та̀ жи́зни своеѧ̀: ра́дꙋйсѧ, вра́гъ ꙗ҆ви́выйсѧ вражде́бныѧ пло́ти.

Ра́дꙋйсѧ, многобо́жїѧ широтꙋ̀ ᲂу҆тѣсни́вый: ра́дꙋйсѧ, бжⷭ҇твенною си́лою і҆́дѡлы попра́вый.

Ра́дꙋйсѧ, ѻ҆стрѣ́йшаѧ стрѣло̀, ꙗ҆звѧ́щаѧ враги̑: ра́дꙋйсѧ, предста́телю, застꙋпа́ѧй вѣ́рꙋющыѧ.

Ра́дꙋйсѧ, великомч҃ниче и҆ цѣли́телю пантелеи́моне.

Конда́къ и҃.

Страннолѣ́пнѡ ꙗ҆влѧ́шесѧ тебѣ̀ гдⷭ҇ь, ѡ҆бодрѧ́ѧ и҆ соблюда́ѧ въ мꙋче́нїихъ за и҆́мѧ є҆го̀: во ѡ҆́бразѣ бо пресвѵ́тера є҆рмола́а, клоко́чꙋщее ѻ҆́лово, въ не́же вве́рженъ бы́лъ є҆сѝ, ѡ҆хладѝ, и҆ въ мо́ри ѿрѣши́въ ве́лїй ка́мень ѿ вы́и твоеѧ̀, и҆зведѐ неврежде́нна на зе́млю. Ты́ же, па́ки предста́въ пред̾ царѧ̀, торже́ственнѡ пѣ́лъ є҆сѝ хрⷭ҇тꙋ̀ бг҃ꙋ: А҆ллилꙋ́їа.

І҆́косъ и҃.

Ве́сь ᲂу҆́мнѣ на нб҃сѝ водворѧ́ѧсѧ, и҆ ни́зꙋ на землѝ сꙋ́щихъ не ѡ҆ставлѧ́еши, сопребыва́ѧ съ на́ми всечестно́ю главо́ю твое́ю, вели́кїй страстоте́рпче хрⷭ҇то́въ, прїе́млѧ ѿ гдⷭ҇а и҆ подаѧ̀ просвѣще́нїе и҆ ѡ҆свѧще́нїе вопїю́щымъ тебѣ̀ такѡва́ѧ:

Ра́дꙋйсѧ, премⷣрости бжⷭ҇твенныѧ и҆спо́лненный: ра́дꙋйсѧ, промышле́нїѧ бж҃їѧ ѡ҆ на́съ таи́нниче.

Ра́дꙋйсѧ, бг҃омꙋ́дренныхъ ᲂу҆мѡ́въ ᲂу҆слажде́нїе: ра́дꙋйсѧ, бг҃олюби́выхъ дꙋ́шъ ᲂу҆веселе́нїе.

Ра́дꙋйсѧ, пресвѣ́тлый хрⷭ҇то́въ би́сере: ра́дꙋйсѧ, ѡ҆свѧще́нный дꙋше́ю и҆ тѣ́ломъ.

Ра́дꙋйсѧ, во дво́рѣхъ перворожде́нныхъ на нб҃сѝ всели́выйсѧ: ра́дꙋйсѧ, въ присноблаже́нныхъ ѡ҆бита́ѧй черто́зѣхъ.

Ра́дꙋйсѧ, свѣ́та трⷪ҇ческагѡ зри́телю: ра́дꙋйсѧ, въ мл҃твахъ къ бг҃ꙋ те́плый ѡ҆ на́съ предста́телю.

Ра́дꙋйсѧ, просвѣще́нїе дꙋша́мъ подава́ѧй: ра́дꙋйсѧ, скорбѧ́щымъ ᲂу҆тѣше́нїе низпосыла́ѧй.

Ра́дꙋйсѧ, великомч҃ниче и҆ цѣли́телю пантелеи́моне.

Конда́къ ѳ҃.

Всѧ́кое є҆стество̀ ᲂу҆диви́сѧ, пантелеи́моне, сїѧ́нїю въ тебѣ̀ блгⷣти и҆ бога́тствꙋ добродѣ́телей: а҆гг҃лоподо́бнѣй чистотѣ̀ твое́й, вели́комꙋ мꙋ́жествꙋ въ лю́тыхъ страда́нїихъ, крѣ́пкой любвѐ ко хрⷭ҇тꙋ̀ и҆ мно́гомꙋ сострада́нїю къ лю́демъ, въ ни́хже твори́ши пресла̑внаѧ, во є҆́же пѣ́ти: А҆ллилꙋ́їа.

І҆́косъ ѳ҃.

Вѣті̑ѧ многовѣща́нныѧ не возмо́гꙋтъ по достоѧ́нїю восхвали́ти борє́нїѧ твоѧ̀, сла́вный добропобѣ́дниче, ка́кѡ непобѣди́мою си́лою бж҃їею ю҆́ный лѣ̑ты побѣдѝ дре́внѧго и҆ и҆ско́ннаго врага̀ и҆ посрамѝ і҆́дѡльскꙋю пре́лесть. Мы́ же, ᲂу҆дивле́нїѧ и҆спо́лненнїи, зове́мъ тѝ:

Ра́дꙋйсѧ, ра́достное зрѣ́лище а҆́гг҃лѡвъ: ра́дꙋйсѧ, бл҃гоговѣ́йное ᲂу҆дивле́нїе человѣ́кѡвъ.

Ра́дꙋйсѧ, кро́вь за хрⷭ҇та̀ и҆злїѧ́вый и҆ въ сме́рти млеко̀ и҆сточи́вый: ра́дꙋйсѧ, тѣ́ло за него̀ мꙋ́ченичестѣй сме́рти преда́вый.

Ра́дꙋйсѧ, и҆сповѣ́дничества пра́вило: ра́дꙋйсѧ, до́блїй во́ине цр҃ѧ̀ царе́й.

Ра́дꙋйсѧ, тьмы̀ держа́вца побѣди́вый: ра́дꙋйсѧ, побѣ́дою твое́ю нбⷭ҇ныхъ и҆ земны́хъ ѡ҆бвесели́вый.

Ра́дꙋйсѧ, го́рнѧгѡ мі́ра ѡ҆бита́телю бл҃же́нный: ра́дꙋйсѧ, до́льнѧгѡ мі́ра мꙋ́дрый стра́нниче.

Ра́дꙋйсѧ, дре́во, ᲂу҆краше́нное плода́ми блгⷣтныхъ дарова́нїй: ра́дꙋйсѧ, носѧ́й добропобѣ̑дныѧ вѣ́тви.

Ра́дꙋйсѧ, великомч҃ниче и҆ цѣли́телю пантелеи́моне.

Конда́къ і҃.

Сострада́нїѧ и҆спо́лненъ, ꙗ҆́кѡ и҆́стинный подража́тель пода́телѧ млⷭ҇ти гдⷭ҇а, честны́й страда́льче, пантелеи́мономъ сі́есть, всемлⷭ҇тивымъ, ѿ него̀ проимено́ванъ є҆сѝ, на всѧ̀ притека́ющыѧ къ тебѣ̀ ми́лость и҆злива́ѧ, ю҆́же и҆ на́мъ неѡскꙋ́днѡ и҆сточа́й, ѡ҆ тебѣ̀ вопїю́щымъ бг҃ꙋ: А҆ллилꙋ́їа.

І҆́косъ і҃.

Стѣ́нꙋ тѧ̀ тве́рдꙋ ѡ҆брѣ́тъ мꙋчи́тель, никі́ими же мꙋ́ками побѣди́мꙋ, покꙋси́сѧ сокрꙋши́ти крѣ́пость твою̀ зꙋбы̑ ѕвѣре́й и҆ ѻ҆́стрїѧми мꙋчи́лищнагѡ колеса̀, ѡ҆ба́че и҆ въ се́мъ ничто́же ᲂу҆спѣ̀: си́ла бо хрⷭ҇то́ва лю́тость ѕвѣре́й ᲂу҆кротѝ, а҆ стра́шное ко́ло, на не́мже ѡ҆браща́емо бѣ̀ тѣ́ло твоѐ, а҆́бїе сокрꙋши́сѧ. Тебѣ̀ ᲂу҆̀бо непобѣди́момꙋ страстоте́рпцꙋ зове́мъ:

Ра́дꙋйсѧ, честно́е хрⷭ҇то́во и҆збра́нїе: ра́дꙋйсѧ, непоро́чное бг҃ови благоꙋха́нїе.

Ра́дꙋйсѧ, тве́рдый а҆дама́нте цр҃кве: ра́дꙋйсѧ, непоколеби́мый сто́лпе, досѧза́ѧй до нб҃сѐ.

Ра́дꙋйсѧ, ѕвѣ́ри ви̑димыѧ ᲂу҆кроща́ѧй: ра́дꙋйсѧ, драко́нѡвъ неви́димыхъ сокрꙋша́ѧй.

Ра́дꙋйсѧ, ѡ҆багре́нный твое́ю за хрⷭ҇та̀ кро́вїю срастворе́нною млеко́мъ: ра́дꙋйсѧ, неꙋвѧда́емыѧ прїе́мый вѣнцы̀.

Ра́дꙋйсѧ, ра́дость причини́вый а҆́гг҃лѡмъ и҆ человѣ́кѡмъ: ра́дꙋйсѧ, просла́вленный бг҃омъ на нб҃сѝ и҆ на землѝ.

Ра́дꙋйсѧ, небожи́телю, ликовствꙋ́ѧй съ мч҃ники: ра́дꙋйсѧ, насыща́ѧйсѧ лицезрѣ́нїемъ хрⷭ҇та̀ пресла́дкимъ.

Ра́дꙋйсѧ, великомч҃ниче и҆ цѣли́телю пантелеи́моне.

Конда́къ а҃і.

Пѣ́снь и҆схо́днꙋю прино́симъ твоемꙋ̀ за хрⷭ҇та̀ заколе́нїю свѧще́нномꙋ, въ не́мже вмѣ́стѣ съ кро́вїю млеко̀ и҆стечѐ ѿ тебє̀, великомч҃ниче, и҆ ма́сличина, под̾ не́юже ᲂу҆сѣ́ченъ бы́лъ є҆сѝ, и҆спо́лнисѧ цѣли́тельныхъ плодѡ́въ. Тѣ́мже хрⷭ҇тꙋ̀, ди́внѡ прославлѧ́ющемꙋ сла́вѧщыѧ є҆го̀, те́плѣ вопїе́мъ: А҆ллилꙋ́їа.

І҆́косъ а҃і.

Свѣтоза́рнаѧ лꙋча̀ бы́лъ є҆сѝ, бг҃омꙋ́дре, во тьмѣ̀ многобо́жїѧ сѣдѧ́щымъ, пꙋтеводѧ́щаѧ къ сл҃нцꙋ пра́вды хрⷭ҇тꙋ̀ бг҃ꙋ, є҆мꙋ́же моли́сѧ, во свѣ́тѣ за́повѣдей є҆гѡ̀ при́снѡ пребыва́ти и҆ на́мъ, сицєва́ѧ ра́дѡстнаѧ тебѣ̀ приносѧ́щымъ:

Ра́дꙋйсѧ, пресвѣ́тлаѧ ѕвѣздо̀, на мы́сленной тве́рди блиста́ющаѧ: ра́дꙋйсѧ, лꙋча̀, хрⷭ҇тоимени́тымъ лю́демъ свѣтѧ́щаѧ.

Ра́дꙋйсѧ, та́инственнѡ ѡ҆блистава́емый ѿ сл҃нца хрⷭ҇та̀: ра́дꙋйсѧ, ᲂу҆́мнѣ зе́млю ѡ҆бтека́ѧй.

Ра́дꙋйсѧ, селе́нїе кра́сное прест҃а́гѡ дх҃а: ра́дꙋйсѧ, сосꙋ́де пречⷭ҇тны́й, и҆злива́ѧй и҆сцѣлє́нїѧ.

Ра́дꙋйсѧ, чⷭ҇тоты̀ сокро́вище: ра́дꙋйсѧ, ми́лости тезоимени́те.

Ра́дꙋйсѧ, црⷭ҇твїѧ нбⷭ҇нагѡ наслѣ́дниче: ра́дꙋйсѧ, вѣ́чныѧ сла́вы соприча́стниче.

Ра́дꙋйсѧ, предста́телю бѣ́дствꙋющымъ въ мо́ри жите́йстѣмъ: ра́дꙋйсѧ, безсре́брениче, помога́ѧй призыва́ющымъ тѧ̀ съ вѣ́рою.

Ра́дꙋйсѧ, великомч҃ниче и҆ цѣли́телю пантелеи́моне.

Конда́къ в҃і.

Блгⷣти ѡ҆би́лїе прїѧ́лъ є҆сѝ, требл҃же́нне, по ѡ҆би́лїю любвѐ твоеѧ̀ ко хрⷭ҇тꙋ̀ бг҃ꙋ. И҆́же и҆ ꙗ҆вѝ тѧ̀ многоцѣле́бнымъ и҆сто́чникомъ, безме́зднѡ врачꙋ́ющимъ дꙋшє́вныѧ и҆ тѣле́сныѧ болѣ̑зни притека́ющихъ къ тебѣ̀ съ вѣ́рою и҆ бг҃ꙋ вопїю́щихъ: А҆ллилꙋ́їа.

І҆́косъ в҃і.

Пою́ще многострада̑льныѧ по́двиги твоѧ̑ за хрⷭ҇та̀, сла́вный страстоте́рпче, хва́лимъ долготерпѣ́нїе твоѐ, ᲂу҆бл҃жа́емъ мꙋ́ченическꙋю кончи́нꙋ, почита́емъ и҆ свѧще́ннꙋю па́мѧть твою̀, застꙋ́пниче на́шъ и҆ цѣли́телю, и҆ въ похвалꙋ̀ сицєва́ѧ тебѣ̀ зове́мъ:

Ра́дꙋйсѧ, бл҃гоче́стїѧ трꙋбо̀ бл҃гозвꙋ́чнаѧ: ра́дꙋйсѧ, мечꙋ̀, посѣца́ѧй нече́стїе.

Ра́дꙋйсѧ, строга́нный на дре́вѣ за распросте́ршаго рꙋ́цѣ своѝ на дре́вѣ крⷭ҇тнѣмъ: ра́дꙋйсѧ, ꙗ҆́кѡ ѡ҆палѧ́емь за него̀, пре́лести пе́щь погаси́лъ є҆сѝ.

Ра́дꙋйсѧ, ꙗ҆́звами твои́ми враги̑ ᲂу҆ѧзви́вый: ра́дꙋйсѧ, кро́вїю твое́ю тѡ́ки і҆́дѡльскїѧ кро́ве и҆зсꙋши́вый.

Ра́дꙋйсѧ, въ кипѧ́щее ѻ҆́лово вве́рженный за хрⷭ҇та̀: ра́дꙋйсѧ, погрꙋже́нный за и҆́мѧ є҆гѡ̀ въ вода́хъ морски́хъ.

Ра́дꙋйсѧ, промышле́нїемъ бж҃їимъ неврежде́нъ въ си́хъ пребы́вый: ра́дꙋйсѧ, ꙗ҆́кѡ чрез̾ ѻ҆́гнь и҆ во́дꙋ мꙋче́нїѧ вше́лъ є҆сѝ въ поко́й нбⷭ҇ный.

Ра́дꙋйсѧ, и҆злива́ѧй неизсѧка́емыѧ стрꙋи̑ ми́лости вѣ̑рнымъ: ра́дꙋйсѧ, бл҃госострада́тельный врачꙋ̀, и҆сцѣлє́нїѧ бл҃года̑тнаѧ подава́ѧй.

Ра́дꙋйсѧ, великомч҃ниче и҆ цѣли́телю пантелеи́моне.

Конда́къ г҃і.

Ѽ многострада́льный и҆ преди́вный страстоте́рпче хрⷭ҇то́въ и҆ цѣли́телю на́шъ пантелеи́моне! ми́лостивѡ прїе́мь сїѐ ма́лое ѿ на́съ приноше́нїе, ѿ многоѡбра́зныхъ недꙋ́гѡвъ и҆сцѣли́ ны и҆ предста́тельствомъ твои́мъ сохранѝ ѿ вра̑гъ ви́димыхъ и҆ неви́димыхъ и҆ вѣ́чнагѡ мꙋче́нїѧ и҆зба́витисѧ на́мъ гдⷭ҇а ᲂу҆молѝ, да во црⷭ҇твїи є҆гѡ̀ вы́нꙋ воспѣва́емъ: А҆ллилꙋ́їа.

І҆́косъ а҃.

Ра́дꙋйсѧ, свѣ́тлосте бл҃гоче́стїѧ: ра́дꙋйсѧ, пресла́вный свѣти́льниче цр҃кви.

Ра́дꙋйсѧ, ю҆́ности преизрѧ́днаѧ похвало̀: ра́дꙋйсѧ, побо́рниче хрⷭ҇то́въ, въ мꙋ́жествѣ неѡдолѣ́нный.

Ра́дꙋйсѧ, небожи́телю всебл҃же́нный: ра́дꙋйсѧ, бжⷭ҇твеннагѡ ра́зꙋма вмести́лище.

Ра́дꙋйсѧ, и҆́мже вѣ́ра возвы́сисѧ: ра́дꙋйсѧ, и҆́мже пре́лесть низложи́сѧ.

Ра́дꙋйсѧ, великомч҃ниче и҆ цѣли́телю пантелеи́моне.

Конда́къ а҃.

Ра́дꙋйсѧ, великомч҃ниче и҆ цѣли́телю пантелеи́моне.

Моли́тва.

Ѽ вели́кїй хрⷭ҇то́въ ᲂу҆го́дниче и҆ пресла́вный цѣле́бниче, великомч҃ниче пантелеи́моне! Дꙋше́ю на нб҃сѝ прⷭ҇то́лꙋ бж҃їю предстоѧ́й и҆ трїѷпоста́сныѧ є҆го̀ сла́вы наслажда́ѧйсѧ, тѣ́ломъ же и҆ ли́комъ ст҃ы́мъ на землѝ въ бжⷭ҇твенныхъ хра́мѣхъ почива́ѧй и҆ да́нною тѝ свы́ше блгⷣтїю разли̑чнаѧ чꙋдеса̀ и҆сточа́ѧй, при́зри ми́лостивнымъ твои́мъ ѻ҆́комъ на предстоѧ́щыѧ лю́ди, честнѣ́й твое́й і҆кѡ́нѣ ᲂу҆ми́льнѡ молѧ́щїѧсѧ и҆ просѧ́щыѧ ѿ тебє̀ цѣлє́бныѧ по́мощи и҆ застꙋпле́нїѧ: прострѝ ко гдⷭ҇ꙋ бг҃ꙋ на́шемꙋ те́плыѧ твоѧ̑ мл҃твы и҆ и҆спросѝ дꙋша́мъ на́шымъ ѡ҆ставле́нїе согрѣше́нїй. Се́ бо мы̀, за беззако́нїѧ на̑ша не смѣ́юще возвѣстѝ ѻ҆чеса̀ на̑ша къ высотѣ̀ нбⷭ҇нѣй, нижѐ вознестѝ гла́съ моле́бный къ є҆го̀ въ бжⷭ҇твѣ̀ непристꙋ́пнѣй сла́вѣ, се́рдцемъ сокрꙋше́ннымъ и҆ дꙋ́хомъ смире́ннымъ тебѣ̀, хода́таѧ ми́лостива ко влⷣцѣ и҆ мл҃твенника за ны̀, грѣ̑шныѧ, призыва́емъ, ꙗ҆́кѡ ты̀ прїѧ́лъ є҆сѝ блгⷣть ѿ негѡ̀ недꙋ̑ги и҆сцѣлѧ́ти и҆ стра̑сти ѿгонѧ́ти.

Молитва понтилею целителю о здравии своем: Молитва Пантелеймону об исцелении | bibliya-online.ru

Акафист святому великомученику и целителю Пантелеимону — Акафистник

Related Posts

Чем заменить дегидратор для ногтей: Как использовать дегидратор и чем его можно заменить

Пауло коэльо алхимик цитаты из книги: Цитаты из книги «Алхимик» Пауло Коэльо – Литрес

Добавить комментарий Отменить ответ